Djei Tí and mí - og 17.000 aðrir....

Sunnudagurinn 24. ágúst 2014

Það er ekki hægt að segja annað en að hápunktur dagsins hafi verið feðgaferð á tónleika stórstjörnunnar Justin Timberlake í Kórnum í Kópavogi í kvöld. Þá fór ég ásamt sonunum Magnúsi og Ágústi og ca 17.000 öðrum til að sjá stórstjörnuna dansa og syngja. Það er ekki oft sem erlendar poppstjörnu koma til Íslands á hátindi ferilsins en Justin Timberlake er einmitt í þeim sporum svo ákveðið var að við feðgar myndum slá til og taka þátt í veislunni.

Samkvæmt fréttum eru þetta með stærri tónleikum sem haldnir hafa verið á Íslandi og voru bara hin ágætasta skemmtun. Ég get ekki sagt að ég þekki feril kappans til hlítar en þónokkur lög þekkir maður ágætlega. Maðurinn er greinilega mikill fagmaður og yfirvegaður. Hann mætti á svið á slaginu kl 21 og hinn hressasti - samt alveg laus við hroka eins og sumir popparar vilja verða. Justin er líka mjög fjölhæfur því fyrir utan að syngja er hann afbragðsdansari og getur spilað á píanó og gítar. Með honum var fjöldi flottra hljóðfæraleikara og dansara þannig að úr varð ágætis sýning án þess að verða einhver vitleysa.

Mynd dagsins er tekin á tónleikum Justin Timberlake í Kórnum í kvöld þar sem við feðgarnir áttum flotta stund ásamt um 17.000 öðrum. Justin, sem notar skammstöfunina JT nokkuð mikið, var með flotta tónleika þannig að úr varð mjög skemmtileg og eftirminnileg skemmtun. Við náðum nokkrum fínum myndum (sjá facebook) og þetta er ein þeirra sem vonandi gefur innsýn í fjör kvöldsins 

Menningarnótt og maraþon!

Laugardagurinn 23. ágúst 2014

Þá er það stóri dagurinn, menningarnótt í höfðuborginni! Það var nóg að gera hjá okkur í fjölskyldunni í dag, fyrir utan að vera með nokkra góð gesti í næsturgistingu um helgina.

Við Inga vorum vökuð upp úr 6:30 til að byrja borða, en markmið dagsins hjá okkur var að klára 21,1 km hlaup (hálf-maraþon) í Reykjavíkurmaraþoninu sem hófst kl 8:40. Hlaupaveðrið var frábært og bæði kláruðum við hlaupið með stæl og náðum við okkar tímamarkmiðum. Systur Ingu, þær Guðrún og Jóna, hlupu báðar 10 km og Magnús Árni tók þátt í 3 km hlaupinu.

Eftir að hafa baðað okkur vel og rækilega eftir hlaupin var farið í bæinn og þar áttum við góðan tíma langt fram á kvöld, þó aðaltíminn hafi farið í að rölta um, sýna sig og sjá aðra.

 

Mynd dagins er af okkur Ingu þar sem við erum komin í mark eftir flott og skemmtilegt hálf-maraþon. Svo fylgja aukamyndir af Magnús Árna sem komin er í mark í sínu hlaupi, Svandísi og Magnúsi að fá sér svaladrykk á Laugaveginum og loks systrum Guðrúnu, Ingu og Jónu í Hljómskálagarðinum. Mjög skemmtilegur dagur og kvöld  

 

Tumi smíðar hús!

Föstudagurinn 22. ágúst 2014

Það er ótrúlega gaman að sjá hvað ótrúlegustu bókamenntaverk geta orðið klassík. Þegar ég var pínulítill gaf bókaútgáfan Iðunn út nokkrar stuttar og einfaldar barnabækur eftir sænska rithöfundinn Gunillu Wolde. Þessar bækur voru mjög vinsælar hjá allra yngstu kynslóðinni en þar voru helstu hetjurnar Tumi og Emma sem voru að gera eitthvað skemmtilegt í hverri bók.

Þessar bækur eru alls ekki dauðar úr öllum æðum því hér á heimilinu hafa þessar gömlu bækur verið í miklum metum hjá heimasætunni, Svandísi Erlu, en Svandís er svo heppinn að báðir foreldrarnir komu með nokkrar af þessum bókum í heimanmund. Ég man að "Tumi smíðar hús" og "Tumi fer til læknis" voru í sérstöku uppáhaldi hjá mér. Emma er þó vinsælust hjá Svandísi og eru bækurnar "Emma fer í leikskóla" og "Emma og litli bróðir" langmest lesnar.

Mynd dagsins er af Svandís Erlu með uppáldsbækurnar sínar um þessar mundir - sem eru bækurnar um Tuma og Emmu eftir sænska rithöfundin Gunillu Wolde. Þessar bækur voru vinsælar fyrir um 40 árum og virðast ennþá halda sínum sjarma -eru því orðnar klassík 

"Týndi" sonurinn kominn heim!

Fimmtudagurinn 21. ágúst 2014

Í blíðunni í kvöld héldum við mikla grillveislu hér á heimilinu. Tilefnið var ekki bara það að Guðrún mágkona var í heimsókn, heldur var líka von á Ingimar tengdapabba í mat og ekki síður Rúnari Inga (syni Jónu mágkonu) og Örnu kærustunni hans, en Rúnar er nú fluttur í höfuðborgina til að hefja nám í Háskóla Íslands. Rúsínan í pylsuendanum var svo heimkoma frumburðarins á heimilinu, Ágústar Loga, sem nánast flutti að heiman í sumar þar sem hann var að vinna út á landi.

Í dag var semsagt síðasti vinnudagur Ágústar í sumarvinnunni en hann hefur starfað í sumar í blómarækunarstöðinni Espiflöt í Reykholti í Biskupstungum. Espiflöt er ein af stærstu (ef ekki sú stærsta) blómaræktunarstöðvum landsins. Vegna þessa hefur Ágúst búið hjá Ingimar afa sínum í sumar en hann býr einmitt í Reyholti. Sambúðin hefur gengið mjög vel að sögn þeirra beggja en þó hefur Ágúst verið duglegur að koma heim um helgar og einstaka kvöld til að hitta fjölskyldu og vini.

Eins og sönnum herramanni sæmir færði Ágúst Logi mömmu sinni auðvitað blómvönd við heimkomuna og það var glatt á hjalla í grillveislu kvöldsins. Skólinn hefst svo hjá dregnum strax í fyrramálið.

Mynd dagins er af blómadreng heimilisins nú í kvöld með blómvöndinn sem hann færði mömmu sinni. Vegna vinnu sinnar í blómræktunarstöðinni Espiflöt í Reykholti í Biskupstungum, þurfti Ágúst Logi nánast að flytja að heiman í sumar. Í dag var síðast vinnudagurinn og skólinn byrjar á morgun. Dregurinn flutti því heim aftur í dag og því var fagnað með flottri grillveislu og góðum gestum 

 

Stjörnuskinið ekki nógu skært

Miðvikudagurinn 20. ágúst 2014

Í kvöld var stór dagur í knattspyrnusögu okkar Íslendinga þegar stórlið Inter Mílanó mætti á Laugardagsvöll til að etja kappi við lið Stjörnunar úr Garðabæ. Þar sem ég er nú mikill áhugamaður um knattspyrnu var ég nokkuð spenntur að fara á þenna leik en þar sem uppselt varð á leikinn á stuttum tíma varð ekkert af því. Í staðinn fór ég með Magnúsi Árna á sport-barinn hér í Mosfellsbænum, Hvíta riddarann. Þar var fullt út úr dyrum eins og oftast er þegar stórleikir í knattspyrnu fara fram því þarna er hægt að horfa á leiki á breiðtjöldum í öllum hornum og borða og/eða drekka eitthvað gott með.

Eins og við var að búast var leikurinn mjög erfiður fyrir Garðbæingana sem hreinlega mættu þarna ofjörlum sínum á knattspyrnusviðinu. Það er svo sem enginn skömm, því Inter Milan er eitt að stærstu liðum í Evrópu og ætti að hafa heimsklassa leikmenn í hverri stöðu. Þrátt fyrir 0-3 tap stóð Stjarnan sig vel í leiknum og er aldeilis búin að standa sig vel í Evrópuleikja-törnininni sem hefur staðið yfir undanfarnar vikur. Til hamingju með flottan árangur Stjörnumenn!

Það er ekki oft sem stórlið knattspyrnunnar koma til Íslands. Við þennan leik rifjast upp mjög eftirminnilegur leikur Skagamanna gegn hollenska liðinu Feyenord sem fram fór á Laugardagsvellinum 1993. Þá stóðu Skagamennirnir heldur betur í Hollensku snillingunum og voru bara betri í leiknum ef eitthvað var. Það fór líka svo að okkar menn sigruðu 1-0 með eftirminnilegu marki frá jaxlinum Óla Þórðar. Eftir þennan sigur greip um sig mikið æði og hátt í 1.000 Íslendingar mætti á seinni leikinn í Hollandi. Sjálfur fór ég í eftirminnilega sólahringsferð á leikinn þar sem flugvél var fyllt af íslenskum fótboltaáhugamönnum sem flugu til Hollands snemma að morgni, áttu gott bæjarrölt yfir daginn, fóru á leikinn um kvöldið og svo var flogið heim upp úr miðnætti. Því miður áttu okkar menn lítinn séns í seinni leiknum og töpuðu. En stemningin í ferðinni og vellinum var engu lík. Mér er til efs að nokkru sinni hafi verið sungið jafn mikið á íslenskum fótboltaleik en á svæðinu sem ég sat á var stór hópur fólks sem söng allan tíman ýmis íslensk lög; rétt eins og maður væri staddur á Brekkusöngnum í Eyjum á Þjóðhátíð. 

Mynd dagsins er tekin á veitingahúsinu Hvíta riddaranum hér í Mosfellbænum í kvöld þar sem við Magnús Árni fórum og horfðum á merkilegan knattspyrnuleik Stjörnunar úr Garðabæ við stórliðið Inter Milan sem fram fór á Laugardagsvellinum. Mílanóbúarnir voru því miður einhverjum númerum of stórir fyrir Garðbæingana en engu að síður var leikur bara hin ágætasta skemmtun. 

Ísland sigrar Spán!

Þriðjudagurinn 19. ágúst 2014

Undanfarna daga höfum við verið með tvo skemmtilega gesti á heimilinu. Það eru annars vegar Guðrún, systir Ingu sem býr í Þýskalandi, og hins vegar spænskur vinur hennar sem heitir Severo. Severo hefur dvalið á Íslandi í rúma viku og er hér á landi í fyrsta skipti.

Severo kvaddi okkur í dag og hélt til síns heima í aðeins meiri hita en við gátum boðið honum upp á í Íslandsferðinni (hann er frá Alicante)  Hann er þrátt fyrir það hinn ánægðasti með land og þjóð og segist aldrei verða "samur" eftir að hafa verið út í íslensku náttúrunni.

Severo er mikill borðtenniskappi og var auðvitað settur í að spila borðtennis við ýmsa fjölskyldumeðlimi meðan á dvöl hans stóð. Hann kenndi Magnús Árna ýmsa snúninga og trix sem ekki hafa sést hér í húsinu áður. Líklega fyrir kurteisis sakir leyfði hann borðtennismeistara heimilisins, Ingu, að vinna sig í óopinberum landsleik í borðtennis milli Íslands og Spánar. 

Mynd dagins er tekin í óopinberum borðtennislandsleik Íslands og Spánar sem fram fór í dag. Þarna eru Inga (Ísland) og Severo (Spánn) á fullu að keppa en Guðrún systir Ingu og Magnús Árni fylgjast kampakát með - og auðvitað vann Ísland (minnir okkur) 

Heimsókn í HR á fyrsta skóladegi!

Mánudagurinn 18. ágúst 2014

Fyrsti skóladagurinn í Háskóla Reykjavíkur (HR) er í dag. Ég fékk að kíkja í stutta heimsókn með góðum hópi fólks og drekka aðeins í mig andrúmsloftið á þessum skemmtilega degi, þó ég sé nú alls ekki að fara í neitt nám.

Ég hef aldrei komið inn í HR eftir að þeir fluttu í núvernadi húsnæði við rætur Öskjuhlíðar. Sjálfur stundaði ég nám í HR árin 2002-2004, sem var MBA-nám með áherlsu á mannauðsstjórnun. Var það nám með vinnu en á þessum árum var HR staðsettur við Ofanleiti (rétt við Kringluna). HR sprengdi það húsnæði utan af sér og flutti í nýtt húsnæði sem byggt var fyrir skólann við rætur Öskjuhlíðar, rétt við Nauthólsvík. Þó húsið sé ekki fullbyggt er það hið glæsilegasta og mjög gaman var að skoða skólann.

 

Mynd dagsins er tekin í dag í Háskóla Reykjavíkur. Þarna erum við sest inn í eina kennslustofuna og Ari Kristinn Jónsson rektor er að segja okkur frá skólanum og því mikla og fjölbreytta starfi sem þar er i gangi. Virkilega gaman að kíkja í heimsókn í HR í dag, kynnast starfseminni, skoða húsnæðið og upplifa andrúmsloftið á fyrsta skóladegi þessa skólaárs  

Þjóðleg þjóðbúningamessa

Sunnudagurinn 17. ágúst 2014.

Aðeins einu sinni á hverju ári er blásið til messu í Tungufellskirkju í Hrunamannahreppi og sú stund var einmitt í dag. Tungufellskrikja er með minnstu og elstu kirkjum landsins. Í fyrra var byrjað á þeim skemmtilega sið að hvetja kirkjugesti til að mæta í þjóðbúningum og fjölmargir taka þeirri áskorun þó ekki nærri allir mæti í þjóðbúningi.

Þar sem ég á ættir að rekja í Tungufell (Helga móðuramma mín var alin þar upp) reyni ég stundum að kíkja þegar messurnar eru og hitta á hóp af ættingjum í leiðinni. Það er jafnan glatt á hjalla og gaman að spjalla við frændfólkið og aðra gesti enda er kirkjukaffi á eftir, helst úti ef veður leyfir.

Tungufellskirkja er nú í eigu Þjóðminjasafnsins. Þessi kirkja er frekar lítil og tekur svona 35 gesti ef vel er troðið inn. Hún var reist 1856 og er um 22 fermetrar. Annars er talið að kirkja hafi verið í Tungufelli frá því um árið 1200 og kirkjuklukkurnar tvær í kirkjunni er álitnar næstum svo gamlar. Í dag var skein sólin skært og kirkjan var vel full út úr dyrum og einhverjir stóðu fyrir utan. Fjöldi fólks mætti í þjóðbúningi og setti það mjög skemmtilegan svip á messuna.

Mynd dagsins er tekin í Hrunamannahreppi í dag þar sem ég mætti í þjóðbúningamessu í einni minnstu kirkju landsins, Tungufellskrikju. Þarna var mikið af ættingjum mínum en fjöldi gesta mætti í þjóðbúningum. Þeir sem það gerðu stilltu sér upp í myndatöku ásamt prestinum og þá smellti ég að þessari mjög svo þjóðlegu mynd. Áhugasamir geta skoðað fleiri myndir úr messunni á facebook-síðu minni. Sannarlega skemmtilegur dagur í Tungufelli í dag 

Eyja meyja og peyja

Laugardagurinn 16. ágúst 2014

Í dag var ákveðið að fara í fjölskylduferð til Vestmannaeyja. Svona ferð er búin að vera á stefnuskráinni í sumar en þar sem góðviðrisdagana hefur vantað var ekki rétti tíminn fyrr en núna. Frumburðurinn, Ágúst Logi, kom reyndar ekki með en í staðinn fengum við Þorstein Inga, systurson Ingu (son Kristínar Erlu) með okkur í ferðina.

Við tókum Herjólf úr Landeyjarhöfn kl 13 og rúmlega hálftíma síðar vorum við farin að spóka okkur í miðbænum í blíðskaparveðri. Eftir bæjarrölt skoðuðum við náttúrugripasafnið og svo var farið að skoða nýja eldfjallsafnið. Það er hreint ótrúlega vel heppnað og bæði börn og fullorðnir voru ánægðir með heimsóknina þangað. Mæli eindregið með því!

Svo var haldið í bíltúr um flesta vegi og vegaslóða Eyjunnar og Herjólfsdalur, Stórhöfði og fleiri áhugaverðir staðir skoðaðir. Auðvitað þurftu líka allir að prufa spranga og gekk það bara ótrúlega vel. Eftir að hafa fengið okkur léttan kvöldverð, þar sem meðal annars við smökkuðum reyktan lunda, var haldið aftur í Herjólf og við vorum kominn til baka í Mosfellsbæinn um kl 23 eftir frábæran dag í Eyjum.

Mynd dagsins er tekin í Vestmannaeyjaferð fjölskyldunnar í dag þar sem sólin skein í heiði. Þarna erum við, við húsið Landlyst sem er á Skansinum og er eitt af elstu húsum Vestmanneyja. Fleiri myndir úr ferðinni eru á facebook hjá Ingu. Orðið mjög þægilegt að skreppa í dagsferð til Eyja, þar sem meyjar og peyjar taka vel á móti ferðalöngum. Frábær dagur í dag 

Mamma mía!

Föstudagur 15. ágúst 2014

Einhvern veginn atvikaðist það svo að upp úr kl 9 í kvöld vorum við Inga ein í kotinu ásamt Svandísi Erlu sem sofnaði eldsnemma. Þegar við hjónakornin kveiktum á sjónvarpinu var hin ægilega rómantíska söngvamyd, Mamma mía, að byrja. Þar sem nokkuð er síðan við Inga höfum séð hana var ákveðið að poppa og horfa á myndina sem var bara hin ágætasta skemmtun.

Reyndar er gaman að rifja upp að mín fyrstu kynni af þessri mynd. Þá hafði hún verið sýnd í bíóhúsum í nokkurn tíma við miklar vinsældir en ég vissi varla af henni. Ákveðið var að prófa að hafa eina "syngdu-með-sýningu" þar sem allir textar laganna birtust á tjaldinu og bíógestir máttu dansa og syngja með. Ég fékk tvo boðsmiða á þessa sýningu og bauð Ingu með mér en við fórum með um 20 manna hópi á sýninguna. Stóri salurinn í Háskólabíó var stútfullur þegar sýningin hófst en við karlarnir í salnum voru samtals svona 10-20 en allt hitt konur á öllum aldri. Svo byrjaði myndin og allir (flestir) sungu með í öllum lögunum og upp úr miðri mynd voru allir (flestir) staðnir upp og sungu og dönsuðu með myndinni. Verð að játa að þetta var dáldið skrítin upplifun og ég var ekki að hífa upp meðaltalið á staðnum í danstöktum. En amk tókst þessi prufusýning það vel að margar svipaðar sýningar voru haldnar í framhaldinu.

Söguþráður myndarinnar verður ekki rakinn hér en myndin byggir á öllum helstu smellum hljómsveitarinnar ABBA, sem hljóma auðvitað allir í myndinni. Hvet nú fólk til að kíkja á myndina ef þið hafið ekki séð hana.

 

Mynd dagins er auglýsingaspjald frá myndinni Mamma mía sem við Inga horfðum óvænt á í kvöld. Gaman að rifja upp þessa mynd sem skartar ýmsum stórleikurum og fullt að góðum ABBA-lögum.