Kominn unglingur á heimilið...

Þriðjudagur 25. ágúst 2009

Í dag varð eldri sonurinn á heimilinu, Ágúst Logi, formlega lýstur sem "unglingur" en í dag hóf hann nám í 8. bekk (= unglingadeild) í Lágafellsskóla hér í Mosfellsbænum. Búið er að stokka upp bekkjunum þannig að nýjir bekkjarfélagar biðu kappans í dag. Ágúst er þó með flestum bestu vinum sínum áfram í bekk og flesta í árgangnum þekkti hann fyrir, þannig að ekki ættu að vera mörg ókunnug andlit í bekknum. Það er pínu sjokk fyrir okkur foreldrana að eiga svona gamalt barn en þetta er víst gangur lífsins

Mynd dagsins er af Ágústi Loga á fyrsta skóladeginum sem "unglingur"

Búningaleikur

Mánudagur 24. ágúst 2009

Það er gaman að leika sér  Seinni partinn í dag horfði ég á Magnús Árna son minn og Elísabetu vinkonu hans í "búningaleik" en þá klæða þau sig í alls kyns búninga og sprikla um allt hús - sífellt að skipta. Þau voru, semsagt, í búingaleik í dag meðan ég horfði á kvennalandsleikinn í fótbolta, Ísland-Frakkland. Alveg ótrúlega fyndið að sjá þau í mismunandi búningum en við höfum gegnum árin komið okkur upp góðu búningasafni fyrir krakka.

 

Mynd dagins er af Magnúsi Árna prins og Elísabetu Tinnu prinsessu í búningaleik í dag

Þessi Bruno!

Sunnudagur 23. ágúst 2009

Í kvöld fórum við Ágúst Logi í bíó. Við sáum myndina Bruno með stórleikaranum Sacha Baron Cohen. Sællar minningar um hina velheppnuðu mynd leikarans um Borat, var maður búinn að búa sig undir hvað sem er á hvíta tjaldinu. Og það var líka eins gott að vera vel undirbúinn því, vægast sagt, er ýmislegt er gert til að halda athyglinni. Við feðgar hlógum ansi mikið af myndinni, þó ég hafi reyndar tekið eftir að hann hló oft á allt öðrum stöðum en ég. Hefði líklegast ekki farið með piltinum á myndina ef ég vissi nákvæmlega um hvað hún væri - en engu að síður hin skemmtilegasta afþreying ef maður tekur sjálfan sig ekki of alvarlega. Vil nú ekki spilla fyrir þeim sem ekki hafa séð myndina með því að rekja söguþráðinn hér.

 

Mynd dagsins er af austurísku tískulöggunni Bruno sem var aðalnúmerið í bíóferð kvöldsins.

Komist í mark á Menningarnótt!

Laugardagur 22. ágúst 2009.

Ég vaknaði eldsnemma í morgun enda stór dagur framundan. Markmið dagsins var að uppfylla gamlan draum og hlauga 21 km hálfmaraþonhlaup í Reykjavíkurmaraþoni en það hef ég aldrei gert. Ég var reyndar ekki búinn að æfa neitt mjög markvisst fyrir þetta. Hef reyndar alltaf reynt að halda mér í ágætis formi og núna í sumar var farið einstaka sinnum út að hlaupa, mjög ómarkvisst þó. Kl. 8:40 hófst hlaupið og ég var bara í góðum gír. Fyrri hluta hlaupsins var ég að hlaupa mun hraðar en ég er vanur og fékk aðeins að finna fyrir því síðustu 6-7 km þegar ég þurfti að hægja nokkuð á mér. Hlaupið gekk þó gríðarlega vel og ég allra náði bjartsýnasta markmiði mínu, var undir 1 klst og 45 min sem þýðir að ég var að hlaupa hvern km á rétt tæplega 5 min. Inga og strákarnir hlupu svo saman 3 km skemmtiskokk þannig að öll fjölskyldan kom heim með verðlaunapening. Ég var ekki mikið til stórræðanna eftir hádegi en skellti mér í heitan pott og horfði á litla fótboltaliðið í Mosó, Hvíta riddarann, keppa og vinna spennadi leik í 3. deildinni en sigurinn tryggði liðinu sæti í úrslitakeppni deildarinnar. Mamma og pabbi komu í kvöldmat og svo héldum við fjölskyldan niður í miðbæ til að taka þátt í Menningarnóttinni. Eftir flugeldasýninguna var haldið heim á leið eftir skemmtilegan dag og kvöld!

Mynd dagsins tók Inga af mér að koma í mark í hálfmaraþoninu. Alltaf gaman að ná markmiðum og sérstaklega þegar það verður í samræmi við björtustu vonir

Ánægjulegt afmæli!

Föstudagur 21. ágúst 2009

Seinni partinn í dag fórum við Inga í fertugsafmæli góðvinar míns, Gísla Tryggvasonar. Gísli bauð gestum sínum í teiti í hvalaskoðunarbátnum Hafsúlunni sem verður, við fyrstu sýn, að teljast nokkuð óvenjulegur staður fyrir afmælisboð. Við Gísli kynntust í MBA-námi í Háskóla Reykjavíkur fyrir nokkrum árum (sjá færslu 5. júní). Sameiginleg vinkona okkar Gísla úr náminu, hún Rannveig, á og rekur hvalaskoðunarfyrirtækið Eldingu. Snekkjan Hafsúlan er eitt af skipum Eldingar. Þar er fínn salur fyrir 50-100 manna boð, hljóðnemar, bar, og allt til alls til veisluhalda. Gísli bauð til afmælisins kl. 17 en kl. 18 var tilkynnt að skipið færi af stað í klukkutíma siglingu um nágrennið enda fínasta veður. Hluti gesta yfirgaf þá veisluna en við hin áttum frábæra stund á siglingu kringum eyjarnar utan við Reykjavík. Merkilegast var þó að rétt utan við höfnina rákumst við á stóran beinhákarl (5-8 m af stærð) sem er mjög sjaldgjæft. Báturinn gat siglt í kringum hann og það var hreint magnað að sjá hákarlinn. Það vakti nokkra athygli okkar gestanna að í aðeins 2-3 km fjarlægð var verið að setja Íslandsmet í sjósundi þar sem tæplega 200 sjósundmenn syntu frá Skarfakletti yfir í Viðey. Þau vissu örugglega ekki af gestinum góða 

 

Því miður náði ekki almennilegri mynd af hákarlinum en það er hægt að sjá myndir á elding.is. Hins vegar náði ég þeim mun skemmtilegri mynd af okkur úr MBA-hópnum sem voru í þessu mjög svo skemmtilega afmæli. Á myndinni eru frá vinstri: Sesselja, (kona Ívars), Rannveig (eigandi Eldingar), Ívar, Vignir (maður Rannveigar og hvalaskoðunarskipstjóri), Ómar (maður Báru), Bára Einars og Inga. Gísli afmælisbarn er reyndar ekki á myndinni en hægt er að sjá mynd af honum hér til hliðar undir "bloggvinir"

"Síðasta kvöldmáltíðin"

Fimmtudagurinn 20. ágúst 2009

Guðrún mágkona, sem býr í Þýskalandi, hefur verið á Íslandi síðustu 3 vikur eða svo. Stóran hluta þessa tíma hefur hún haft aðsetur hér hjá okkur, þó hún hafi verið á fleygiferð um allt land. Í kvöld hélt hún til baka til Þýskalands. Það er alltaf gaman að hafa Guðrúnu í heimsókn enda venjulega líf og fjör í kringum hana. Nú í kvöld borðuðum við saman "síðustu kvöldmáltíðina" áður en Inga og strákarnir skutluðu henni í Leifsstöð. Guðrún vildi endilega fá að velja og elda kvöldmatinn. Fyrir valinu var Tex-Mex veisla sem Guðrún töfraði fram, strákunum sérstaklega til mikillar gleði.

Mynd dagsins er af okkur fjölskyldunni og Guðrúnu mágkonu við kvöldmatarborðið í kvöld. Nú er bara að byrja telja niður þangað til Guðrún kemur næst...

Vetrarstarfið skipulagt

Miðvikudagurinn 19. ágúst 2009

Í hádeginu í dag hittumst við nokkrir félagar og fengum okkur að borða saman. Fyrir utan að eiga góða stund saman var ætlunin að ræða aðeins vetrarstarf í félagsskap sem við erum í, sem ber hið merka nafn club 71 (sjá færslur 4. júlí og 23. maí). Það var mikið bollalagt og skeggrætt og spennandi vetrarstarf framundan í klúbbnum

 

Þar sem ég var ekki með neina myndavél á mér í dag ákvað ég bara að hafa mynd dagsins af hinum ágæta veitingastað Laugaás en þar átti ég góða stund með góðum félögum í hádeginu í dag!

"Dómarann í sturtu!"

Þriðjudagur 18. apríl 2009

Undanfarin ár hef ég öðru hverju verið fenginn til að vera dómari í leikjum yngri flokka hjá knattspyrnudeild Aftureldingar hér í Mosfellsbæ. Það er langt því frá að ég sækist eftir miklum frama á þessum vettfangi heldur kemur þetta til að illri nauðsyn því flest knattspyrnufélög eru oft í miklum vandræðum að fnna dómara á leiki sína. Fyrir nokkrum árum tókum við okkur til, nokkrir pabbar, og fórum á dómaranámskeið þanng að það myndaðist kjarni af dómurum hér í Mosfellsbæ. Dómgæslan er líka ágætis heilsurækt enda mældi einn í hópnum að í venjulegum leik sé dómarinn að hlaupa 5-8 km. Dómarastarf er þó eitt vanþakklátasta starf sem til er enda fá dómarar sjaldnast hrós, í besta falli þögn. Oft er verið að tuða og koma með aðfinnslur sem sjaldnast eiga við rök að styðjast. Yfirleitt er þó bara gaman að fara út að hlaupa í fríska loftinu og gera íþróttafélaginu gagn í leiðinni. Í kvöld fór ég á knattspyrnusvæðið á Tungubökkum hér í Mosfellsbæ þar sem ég dæmdi leik í 3. flokki karla (15-16 ára). Afturelding beið þar lægri hlut fyrir Þrótti. Það var í mörg horn að líta í dómgæslunni eins og oft vill verða hjá þessum aldursflokki, enda ungir menn sem eru að sligast undan hormónaflæði

Mynd dagsins er af dómaranum mér með rauða spjaldið á loft en ég varð, því miður, að lyfta því tvisvar á loft í leik kvöldsins. 

Feðgakvöld

Mánudagur 17. ágúst 2009

Í dag fóru Inga og Magnús Árni, ásamt Guðrúnu mágkonu, í heimsókn á Hvanneyri meðan ég fór í vinnuna. Þar sem hvanneyrsku ferðalangarnir komu ekki fyrr en seint í kvöld og ég var að vinna alveg framundir kvöldmat, ákvað ég að bjóða Ágústi út að borða enda var hann búinn að vera einn heima í dag. Fyrir valinu varð American style við Bíldshöfða.

Mynd dagsins er af Ágústi Loga á American Style nú í kvöld. Ágúst fékk sér ostborgara en ég borðaði af heilsumatseðli staðarins kjúklingabringu, bakaða kartöflu og hrásallad

 

 

 

Grillveisla til heiðurs hjólreiðahetjum

Sunnudagur 16. ágúst 2009

Mestur hluti dagsins fór í að mála þakkantinn (sjá færslu gærdagsins). Því miður kom rigning seinni partinn þannig að verkefnið kláraðist ekki. Í staðinn stukkum við fjölskyldan upp í bíl og keyrðum í sumarbústað fjölskyldunnar í Úthlíð. Þar var að byrja grillveisla til heiðurs Ágústi Loga og Bryndísi frænku en þau tóku sig til í dag og hjóluðu frá Mosfellsheiði, gegnum Þingvelli, yfir Lyngdalsheiðina og alla leið í Úthlíð, alls 56 km!!! Eftir hjólatúrinn skelltu þau sér í pottinn og við fjölskyldan áttum góða stund með Bryndísi, mömmu og pabba yfir grillaðri grísasteik. Svo voru hjólreiðagarparnir, ásamt hjólum, keyrðir til baka í Mosfellsbæinn.

Mynd dagsins er af hjólreiðagörpunum Ágústi Loga og Bryndísi. Þarna eru þau komin á pallinn í Úthlíð eftir alls 56 km hjólreiðar - ótrúlega flott hjá þeim