Endur fá brauð á "letidegi"

Mánudagur 22. febrúar 2010

Í dag er ennþá skólafrí í Lágafellsskóla hjá sonum mínum, þeim Ágúst Loga og Magnúsi Árna. Ég ákvað því að eiga rólegan frídag með þeim piltum í dag. Við sváfum lengi og áttum sannkallaðan "letidag" saman. Seinni partinn bauð ég Magnúsi Árna og Elísabet vinkonu hans í ferð á Reykjavíkurtjörn til viðhalda þeim skemmtilega sið að gefa öndunum brauð. Þetta er alltaf jafngaman og maður gerir þetta allt of sjaldan. Á síðustu stundu slóst Ágúst Logi líka með í för. Tjörnin var alveg frosinn í dag og einhverjir voru að skauta. Venju samkvæmt var vök fyrir endur, svani og annan fiðurfénaði í horninu við Iðnó. Þar setti fjölmennur gæsahópur mestan svip á svæðið en þær voru ansi frekar og ákveðnar í sínum aðgerðum þegar í ljós kom að vð lumuðum á brauðmolum. Litlu krakkarnir vour hálfhræddir við þær í byrjun en svo skemmtum við okkur vel við að gefa brauð, hlaupa á ísnum á tjörninni og skoða landakortið í ráðhúsinu.

Mynd dagsins tók Ágúst Logi á tjörninni í Reykjavík í dag. Þarna er ég ásamt Magnús Árna og Elísabetu vinkonu hans að gefa brauð í allar áttir. Mjög skemmtilegur dagur

Tvær systur í upphafi Góu

Sunnudagurinn 21. febrúar 2010

Ég vaknaði snemma í morgun í tilefni af konudeginum, upphafsdegi hins gamla mánaðar Góu. Meðan gestir og heimilismenn hjá Jónu mágkonu á Akureyri voru í fastasvefni smellti ég mér í hið skemmtilega bakarí á Akureyri, Bakaríð við brúnna og keypti þar spennadi morgunmat (eða eiginlega meira bröns). Þar var fullt hús og 99% karlmenn í sömu erindagjörðum og ég. Svo kom ég við í skemmtilegri blómabúð, Býflugunni og blóminu,  þar sem var ekki alveg jafnmikið að gera þó kyntahlutfall viðskiptavina hafi verið allan tímann 100% karlar. Afgreiðsludaman sagði mér í óspurðum fréttum að það væri ótrúlegur munur á konudegi og bóndadegi í búðinni hjá þeim. Karlanir sem kæmu á konudaginn væru meira brosandi, spjallandi og afslappaðri og "vildu eitthvað fallegt" meðan konurnar sem kæmu á bóndadaginn væru önugri og óþolinmóðari og hefðu eiginlega bara áhuga á að gefa karlinum sínum blóm sem standa sem lengst. Þegar heim var komið aftur náðum við strákarnir að gera allt klárt fyrir morgunmat/bröns áður en systurnar Inga og Jóna voru vaktar og þeim færð blóm í tilefni dagsins. Um hádegið fórum við Ágúst Logi ásamt Rúnari Inga syni Jónu aðeins í Hlíðarfjallið. Veðrið var reyndar ekkert spes svo fáir voru í fjallinu. Það þýddi heins vegar að engin bið var í lyfturnar. Um miðjan dag héldum við fjölskyldan svo af stað suður yfir heiðar í Mosfellsbæinn eftir skemmtilega helgi á Akureyri.

Mynd dagsins er af systrunum Ingu og Jónu sem brostu sínu breiðast í dag í tilefni konudagsins  

Skíði og menning á Norðurlandi

Laugardagur 20. febrúar 2010

Eins og í gær erum við fjölskyldan á Akureyri í góðu yfirlæti hjá Jónu mágkonu. Í nótt snjóaði töluvert í viðbót þannig að nægur snjór er á Akureyri þessa dagana. Þegar allir voru vaknaðir héldum við fjölskyldan upp í Hlíðarfjall á skíði. Þar var ágætis veður en ansi fjölmennt. Í fréttum kom fram að hátt í 3.000 manns hefðu verið í fjallinu í dag. Við fengum reyndar fínt bílastæði en um hádegisleitið voru öll bílastæði full þannig að fólk þurfti að leggja bílum sínum á Akureyri og taka rútur til og frá Hlíðarfjalli. Þetta var nú samt mjög skemmtilegur dagur í fjallinu þó margt væri um manninn og nokkuð löng bið í skíðalyfturnar. Kl. 19 vorum við komin úr fjallinu og búin að þvo okkur og þrífa, en þá vorum við Inga mætt í leikhúsið til að horfa á leiksýningu Leikfélags Akureyrar á verkinu 39 þrep. Með okkur í för voru Jóna mágkona og Líney vinkona hennar en einnig komu með okkur vinafólk okkar héðan úr Mosó, þau Halli og Ólína, og Jóhanna og Elvar. Þau eru öll, eins og við, í Akureyrarferð um helgina með fjölskyldur sínar. Leiksýningin 39 þrep er hin skemmtilegasta en hún byggir á sögu frá stríðárunum sem búið er að setja í mjög skemmtilegan "aulabrandara-búning". Verkið minnir nokkuð á sýningu Spaugstofumanna á Harry og Heimi í Borgarleikhúsinu en þetta er blanda sem gengur mjög vel upp og áhorfendur eru skellihlægjandi allan tímann - ef þeir eru á annað borð tilbúnir að vera með í gríni af þessu tagi. Eftir leiksýninguna fórum við svo saman út að borða á veitingahúsið Strikið og áttum þar saman skemmtilega stund í lok þessa fjöruga dags.

Mynd dagsins er tekin í Hlíðarfjalli á AKureyri í dag í skíða- og menningarferð fjölskyldunnar. Þarna er Ágúst Logi bretta-töffari en hann er að verða nokkuð duglegur á snjóbrettinu sem hann fékk fyrir tveimur árum. Mjög skemmtilegur dagur

Nægur snjór

Föstudagur 19. mars 2010

Í dag erum við fjölskyldan stödd á Akureyri. Þessa helgina eru skólafrí í Lágafellsskóla þar sem synir okkar stunda nám. Það var því ákveðið að skella sér í skíða- og menningarferð til Akureyrar. Þar býr Jóna mágkona ásamt fjölskyldu sinni og alltaf hægt að fá gistingu á besta stað í bænum. Þegar við vorum risin úr rekkju um kl. 10 viðraði ekkert sérstaklega vel til skíðaiðkunar þó nægur væri snjórinn. Við Ágúst Logi ákváðum þó að skella okkur í Hlíðarfjallið. Þar var þokkalegt verður og ekki margt þannig að þetta var bara fínt. Ég keypti þó aðeins þriggja tíma kort í lyfturnar og eftir þann tíma fór ég til baka og skildi Ágúst eftir þar sem hann var ásamt nokkrum félögum héðan úr Mosó. Á meðan fórum við Magnús Árni út í garð, ásamt Rúnari Inga frænda og bjuggum til risastórt snjóhús enda nægur snjór á Akureyri. Um kvöldið fórum við fjölskyldan svo í matarboð til Siggu og Svans vinafólks okkar þar sem frú Sigríður bauð upp á gómsæta rétti og við ættum frábæra stund með þeim áður en haldið var í rúmið upp úr miðnætti.

Mynd dagsins er tekin í matarboðinu hjá Siggu og Svan nú í kvöld. Þarna er fótboltaspil á fullu hjá strákunum en á myndinni eru Bergvin og Svanur synir þeirra hjóna ásamt okkar pjökkum, þeim Ágústi Loga og Magnúsi Árna.

Aksjón fyrir Akureyrarferð

Fimmtudagur 18. febrúar 2010

Það var í mörg horn að líta í vinnunni í dag, sérstaklega þar sem ég er að fara í langt helgarfrí. Í kvöld ætlum við fjölskyldan til Akureyrar í skíða- og mennignarferð. Stefnan er að dvelja þar fram á sunnudagskvöld. Ég ætla svo að vera í fríi á mánudaginn líka - það verður alveg ljómandi. Ég þurfti því að klára ýmislegt áður hægt var að halda af stað. Vinnudagurinn endaði reyndar mjög skemmtilega en kl. 18 var ég mættur á Hrafnistu í Reykjavík, einn af vinnustöðum mínum. Þar fór fram skemmtikvöld fyrir heimilsfólkið með glæsilegum kvöldverði og skemmtiatriðum, þar sem m.a. Diddú tók lagið. Við fjölskyldan náðum að leggja af stað til Akureyrar rétt fyrir kl. 21. Færðin var fín og mjög fallegt veður var á leiðinni. Umferð var nánast enginn og við renndum því í hlað hjá Jónu mágkonu á Akureyri rétt fyrir kl. eitt.

Mynd dagsins er tekin á Hrafnistu í Reykjavík, einum vinnustaða minna en þar fór fram skemmtileg kvöldskemmtun fyrir íbúana nú í kvöld. Ég fékk þann heiður að setja hátíðinna og eftir borðhald og nokkur skemmtiatriði fékk ég að laumast í burtu þar sem við fjölskyldan vorum á leið norður til Akureyrar.

Öskudagurinn..!

Miðvikudagurinn 17. febrúar 2010

Í dag er hinn forni og skemmtileg Öskudagur. Synirnir fóru auðvitað í búningum í skólann í tilefni dagsins. Eftir mikla umhugsun síðustu daga ákvað Magnús Árni (7 ára) að vera galdrakarl og safnaði saman ýmsu dóti úr búningasafni heimilisins til að gera sig fínan. Ágúst Logi (13 ára) ákvað að láta aldurinn ekkert stoppa sig og skellti sér í gömul jakkaföt af mér til að leika "karl í jakkafötum". Hann dró svo fram gamla Hawaii-skyrtu af mér og 20 ára gömul sólgleraugu. Þeir áttu svo góða stund í dag í skólanum sínum. Ágúst fór svo eitthvað á stúfana með félögum sínum í bæinn til að syngja fyrir nammi en Magnús bíður með það eitt ár í viðbót.

 

Mynd dagsins er af sonunum á heimilinu í öskudagsbúningunum. Magnús Árni var galdrakarl og Ágúst Logi var karl í jakkafötum!

39!

Þriðjudagurinn 16. febrúar 2010

Í dag er víst dagurinn sem ég varð 39 ára! Samkvæmt fjölskylduhefðinni var ég vakinn eldsnemma í morgun með afmælissöng annara fjölskyldumeðlima. Auðvitað fylgdi söngnum terta með afmæliskertum sem ég þurfti að blása á og nokkrir pakkar. Þetta var mjög skemmtileg stund áður en piltarnir héldu í skólann en við foreldrarnir í vinnuna. Það var nóg af verkefnum í vinnunni í dag og dagurinn leið fljótt þó öðru hvoru væri ég (skemmtilega) minntur á afmælisdaginn. Í hádeginu fékk ég gómsætt saltkjöt í tilefni sprengidags. Um kaffileitið bauð ég svo nokkrum samstarfsaðilum upp á alvöru súkkulaðiköku með þeyttum rjóma sem féll í góðan jarðveg. Ég hef nú ekki verið mikið fyrir að halda upp á afmælið nema þegar stórafmæli eru og í kvöld var enginn undantekning. Inga eldaði samt uppáhaldið - lambahrygg - með brúnuðum kartöflum og tilheyrandi og mamma og pabbi kíktu í mat þar sem við skemmtum okkur vel. Bara alveg hinn fínasti afmælisdagur, en nú er farið að styttast heldur betur í 40 árin

Mynd dagsins er af mér á seinni hluta síðustu aldar, nokkuð áður en ég varð 39 -, svona í tilefni afmælisins!!!

Og þá er það bolludagurinn!!!

Mánudagur 15. febrúar 2010

Ég rétt náði að stökkva fram úr rúminu í morgun áður en Magnús Árni var mættur með bolluvöndinn inn í svefnherbergi til að "bolla" okkur foreldrana rækilega. Hann gerði forláta bolluvönd í skólanum á föstudaginn og var búin að bíða spenntur alla helgina eftir að fá að nota gripinn. Þeir bræður fengu auðvitað bollur með sér í nesti í skólann. Ég fékk kjötbollur í hádeginu í vinnunni og ljúffengar rjómabollur í síðdegiskaffinu. Ég borðaði reyndar óvenjufáar bollur í dag miðað við síðustu bolludaga þar sem ég hef lagt mig virkilega fram í bolluátinu. Einn eftirminnilegasti bolludagur á síðustu árum rifjast alltaf upp fyrir mér á þessum degi. Þá var ég að vinna í samstarfið við nokkra Dani og sendi þeim tölvupóst að á Íslandi væri "bollu-dagur" í dag. Það var ekki liðið nema andartak þegar allir símar tóku að hringja og voru það Danirnir sem trúðu ekki eigin augum þegar þeir sáu tölvupóstinn - hvað væri eiginlega í gangi hjá okkur klikkuðu Íslendingunum!!! Þeir sem eru ekki vel að sér í dönsku slangri verða sjálfir að finna út hvað þeir dönsku voru að misskilja... Í tilefni dagins verður myndin í dag að vera almennileg bollumynd - nammi namm!!!

Hópknús og tertur á Valentínusardegi!

Sunnudagur 14. febrúar 2010

Þó Magnús Árni sonur minn hafi orðið 7 ára hinn 25. janúar hefur ekki gefist tími fyrr en í dag til að halda fjölskyldu- og vinakaffi til að fagna þessum merka áfanga í lífi piltsins. Við Magnús fórum reyndar fyrir veisluna niður á torg hér í Mosfellsbænum þar sem reyna átti að setja heimsmet í hópknúsi í upphafi "Kærleiksviku" Mosfellsbæjar. Mettilraunin fór fram í góðu veðri en eftir ströngum reglum frá heimsmetabókinni. Um 370 manns mættu en það þurfti víst yfir 600 til að slá heimsmetið. A.m.k. var þetta Íslandsmet. Eftir að hafa sett Íslandsmetið fórum við Magnús Árni heim en þar komu nokkrir ættingjar og nágrannar saman og fögnuðu 7 ára afmæli kappans eins og áður sagði. Inga var búin að töfra fram aragrúa af ýmsum tertum og brauðréttum. Magnús Árni var hinn ánægðasti með daginn en hér með er afmælishaldi vegna 7 ára afmæli hans lokið

Mynd dagsins er tekin á torginu hér í Mosfellsbæ í dag á Valentínusardegi, þar sem við Magnús Árni vorum með í að setja Íslandsmet í hópknúsi. Á myndinni er Hreiðar "knús-stjóri" að ljúka við að fara yfir reglurnar áður en knúsið hófst og eins og sjá má fylgist lögreglan og allir helstu fjölmiðlar með að þetta fari nú allt rétt fram. Bara gaman!!!

9 réttir!!!

Laugardagur 13. febrúar 2010

Fyrirsögnin á ekki að tákna að mér hafi gengið rosalega vel að tippa í getraunum enda kannski ekkert afrek að vera þar með 9 rétta af 13. Þó það væri vissulega gaman var samt ennþá skemmtilegra í kvöld en þá héldum við Inga upp á Akranes í heimsókn til Sævars og Hafdísar vinafólks okkar sem þar héldu alveg svakalegt matarboð. Fleiri félagar voru með í för en það voru Erlingur og Heida og svo bættust Skagamennirnir Ástþór og Sigrún í hópinn. Sævar og Hafdís voru með ítalskt þema í matarboðinu og höfðu lagt mikla nattni í að gera þetta sem glæsilegast. Alls voru 9 réttir á matseðlinum - 3 forréttir, 3 aðalréttir og 3 eftirréttir. Auðvitað stóð maður sína plikt í þessu og sporðrenndi öllum réttunum og fékk sér jafnvel ábót á sumt . Þetta var hin glæsilegasta veisla og borðhaldið stóð yfir í um fjórar klukkutíma. Það er alveg dásamlegt að gera þetta einstaka sinnum þó vigtin sé ekki besti vinur manns daginn eftir.

 

Mynd dagsins er tekin í matarboðinu hjá Sævari og Hafdísi vinafólki okkar í kvöld. Þar snöruðu þau skötuhjú fram 9 rétta veislumáltíð og við áttum frábært kvöld saman!!! Á myndinn eru frá vinstri. Erlingur, Sigrún, Hafdís, Sævar, Ástþór, Inga og Heida.