Hilton heimsótt á Bóndadaginn!

Föstudagur 22. janúar 2010

Í dag er Bóndadagurinn, upphafsdagur Þorra, sem er mánuður sem er í miklu uppáhaldi hjá mér. Kl. 18 var ég mættur á árlegt þorrablót Hrafnistu í Reykjavík, vinnustaðar míns. Þar var mikið um dýrðir og karlakórinn Fjallabræður var án efa hápunktur kvöldsins. Maturinn var auðvitað frábær líka þó ég hafi að þessu sinni bara rétt bragðað að kræsingunum. Ég stakk svo af rétt fyrir kl. 20 til að hitta hana Ingu mína. Í tilefni 20 ára afmælis okkar (sjá færslu 19. janúar) og bóndadagsins ákváðum við að gera okkur dagamun og gista eina nótt á hótel Nordica Hilton. Það var nú aldeilis gaman. Við fengum okkur að borða á veitingastaðnum VOX á jarðhæðinni og áttum skemmtilegt kvöld

 

Mynd dagsins er tekin á veitingastaðnum Vox á hótel Nordica Hilton nú í kvöld. Þar héldum við Inga upp á bóndadaginnn og að 20 ár voru í vikunni síðan að við kynntumst!

Andrés valinn á boðskortið

Fimmtudagur 21. janúar 2010

Í dag vorum við Magnús Árni að undirbúa 7 ára afmæli kappans sem verður næsta mánudag. Við bjuggum til boðskort en öllum strákunum í bekknum hans verður þá boðið til stórafmælisveislu. Magnús Árni valdi að hafa nokkrar myndir af Andrési önd á boðskortunum. Eftir að við höfðum prentað þau út skrifaði Magnús nöfn á hverjum og einum gesti á kortin og svo þurfti að fara með þau til piltana sem Magnús hafði mjög gaman af. Nú er bara að telja niður dagana (a.m.k. er Magnús Árni löngu byrjaður að gera það)!

 

Mynd dagsins er af boðkorti fyrir 7 ára afmælisboð Magnúsar Árna sem verður á mánudaginn en við feðgar vorum að græja það saman í dag.

Horft á handboltaveislu

Miðvikudagur 20. janúar 2010

Nú er enn eitt handboltamótið hafið þar sem íslenska landsliðið eða "strákarnir okkar" taka þátt. Ég hef alltaf haft ágætis áhuga á handbolta en þó finnst mér allt önnur íþrótt og skemmtilegri vera í gangi þegar bestu landslið heims koma saman. Evrópumótið í Vín er semsagt að hefjast og ætlunin er að reyna að sjá alla leiki íslenska liðsins. Er búinn að færa samviskusamlega inn í dagbókina hvenær leikir íslenska liðsins eru þannig að maður sé ekki að asnast til að bóka fund ofan í miðjan leik eða gera annars konar skipulagsvitleysu. Það er sannkölluð handboltaveisla framundan!  

Mynd dagsins er af Magnúsi Árna og sjónvarpinu þar sem auðvitað er verið að sýna handboltaleik. Það er ljóst að maður á eftir að vera límdur við skjáinn næstu daga enda mjög spennandi Evrópumót framundan hjá íslenska landsliðinu! 

20 ár maður minn!

Þriðjudagur 19. janúar 2010

Stórmerkilegur dagur í dag í fjölskyldusögunni! Í dag eru nefnilegast 2o ár síðan við Inga kynntumst. Púff, þetta er svakalega há tala þegar maður sér hana svona á blaði fyrir framan sig. Við vorum bæði í námi í Fjölbrautaskóla Vesturlands á Akranesi og kynntumst þar, nánar tiltekið út í sjoppu eftir skólaball. Fljótlega vorum við farin að draga okkur saman og erum því búin að eyða meira en hálfri ævinni saman. Það hefur auðvitið mjög margt skemmtilegt gerst á þessum 20 árum en tíminn er búinn að líða alveg fáránlega hratt  

Mynd dagsins er tekin snemma árs fyrir 20 árum eða árið 1990. Þarna erum við Inga semsagt á sokkabandsárunum, örlítið yngri en við erum í dag en við kynntumst fyrst 19. janúar árið 1990 og höfum alltaf haldið upp á þennan merka dag á hverju ári  

Pési grallaraspói og Mangi vinur hans!

Mánudagur 18. janúar 2010

Þessa dagana eru við Magnús Árni að lesa saman söguna "Pési grallaraspói og Mangi vinur hans". Þessi saga er um 40 ára gömul og er eftir danska rithöfundinn Ole Lund Kirkegaard. Ole þessi er líklega þekktastur fyrir söguna um Gúmmí-Tarsan. Höfundurinn samdi nokkrar mjög skemmtilegar sögur fyrir 30-40 árum eins og Fúsi froskagleypir, Hodja og töfrateppið og Ottó nashyrningur. Þegar ég var strákur voru þessar sögur í miklu uppáhaldi hjá mér enda eru allar sögurnar um mikla prakkara sem þora alveg að bjóða hinum fullorðnu birginn sem og ýmsum sem eru ekki góðir. Við Magnús erum búnir að hlægja mikið af sögunni og byrjuðum nú bara á því að hlæja að nafninu. Það er alveg ljóst að við eigum eftir að lesa saman fleiri sögur eftir þennan skemmtilega höfund.

Mynd dagins sýnir Magnús Árna steinsofnaðan með hina stórskemmtilegu bók um Pésa grallaraspóa og Manga vin hans

Mjallhvít og mýrarboltinn!

Sunnudagur 17. janúar 2010

Eftir hádegið í dag brugðum við Magnús Árni okkur í leikhús. Meðan Inga sat heima með Ágústi Loga, sem var að læra undir próf, héldum við Magnús í bæjarleikhúsið hér í Mosfellsbænum. Þar er Leikfélag Mosfellssveitar að sýna barnasýninguna um Mjallhvíti og dvergana sjö. Þetta var hin skemmtilegasta sýning eftir hefðbundnum söguþræði þessa fræga ævintýris. Búið var að semja nokkur lög og texta sem krydduðu sýninguna með fínum hætti. Eftir að komið var heim fórum við feðgar, allir þrír, út á fótboltavöllinn hér fyrir utan ásamt Elísabetu vinkonu Magnúsar. Þar var farið í fótbolta, sem fljótlega fór þó að breytast í mýrarbolta þar sem ferkar heitt var úti og smá væta. Við byrjuðum að renna á hausinn, eitt af öðru með tilheyrandi hlátrasköllum. Að leik loknum komu allir heim skellihlægjandi en blautir og skýtugir eins og vera ber í góðum mýrarbolta. Ótrúlega hressandi samt

Að lokinni sýningu á Mjallhvíti máttu gestir heilsa upp á ævintýrahetjurar og láta taka af sér myndir. Magnús Árni var alls ekki til í það og vild bara fara beint heim. Það tókst því ekki að mynda hann með ævintýrahetjunum. Mynd dagins er því fengin að láni hjá Leikfélaginu og sýnir Mjallhvíti ásamt ungum aðdáendum.

Góðir vinir í heimsókn

Laugardagur 16. janúar 2010

Um miðjan dag í dag komu góðir vinir í heimsókn til okkar í Hrafnshöfðann. Þetta voru þau Guðjón og Gunna vinafólk okkar. Með í för voru afkvæmin þeirra, Einar Gunnar (6 ára) og Ísey Björg (3 ára). Þetta var skemmtilegur dagur sem við áttum saman; krakkarnir léku sér á fullum krafti og við hinir fullorðnu áttu gott spjall enda allt of lang síðan við höfum náð að hittast. Svo snæddum við ljómandi kvöldverð sem Inga galdraði fram og komið var langt fram á kvöld þegar þau fjölskyldan kvöddu okkur. Mjög ánægjulegur dagur

Mynd dagins tekin í heimsókn Guðjóns og Gunnu til okkar í dag (og kvöld). Þarna erum við að gæða okkur á ís og súkkulaðiköku sem er alltaf alveg ljómandi gott!

Alltaf gaman að ljúka áfanga sem lengi hefur verið stefnt að!

Föstudagur 15. janúar 2010

Í dag var skemmtilegur dagur í vinnunni. Kl. 10 í morgun var ég viðstaddur þegar Sjómannadagsráð, eigandi Hrafnistuheimilanna (vinnustaðar míns) og Kópavogsbær uundirrituðu rammasamning um starfsemi nýs hjúkrunarheimilis sem verður tekið í notkun við Boðaþing í Kópavogi nú í mars ásamt samtengdri þjónustumiðstöð og íbúðum fyrir aldraða. Félags- og tryggingamálaráðuneytið og Kópavogsbær byggja hjúkrunarheimilið við Boðaþing, en rekstur þess verður á vegum okkar á Hrafnistu og er sannarlega spennandi verkefni. Samhliða byggingu hjúkrunarheimilisins er Kópavogsbær nú að leggja lokahönd á byggingu samtengdrar þjónustumiðstöðar, en þar verða m.a. mötuneyti, félagsstarfi, dagvistun, endurhæfing, sundlaug, starfsmannaaðstaða og fleira. Þetta verkefni er búið að vera mörg ár í undirbúningi og því var mjög góð tilfinning þegar skrifað var undir samkomulagið. Það eru nú samt fjölmörg handtök eftir áður en hægt verður að opna starfsemina en þau verður bara að klára - eitt í einu.

Mynd dagsins er tekin við Boðaþing fyrr í dag þar sem Sjómannadagsráð og Kópavogsbær undirrituðu samning um þjónustustarfsemi fyrir aldraða við Boðaþing í Kópavogi en þessi starfsemi hefst í mars. Á myndinni eru frá vinstir: Ármann Kr. Ólafsson og Gunnsteinn Sigurðsson frá Kópavogsbæ og Guðmundur Hallvarðsson stjórnarformaður Sjómannadagsráðs, ég og Ásgeir Ingvason forstjóri Sjómannadagsráðs.

Stúlkan sem lék sér að eldinum

Fimmtudagur 14. janúar 2010

Aldrei þessu vant ákváðum við Inga að leigja okkur DVD-mynd nú í kvöld. Þetta gerist reyndar mjög sjaldan því við verjum ekki miklum tíma í sjónvarpsgláp. Ég reyndi út í Snælands-videó og valdi fyrir okkur myndina "Stúlkan sem lék sér af eldinum " Myndin er framhald af myndinni "Karlar sem hata konur" eftir sænska metsölurithöfundin Stieg Larsson. Í myndinni er það hin magnaða Lisbeth Salander sem lendir í magnaðri atburðarás með blaðamanninum Mikael Blomkvist. Myndin er mjög mögnuð þó mér hafi ekki fundist hún jafngóð og fyrri myndin um "Karla sem hata konur". Nú er bara að bíða eftir þriðju myndinni sem væntanleg er í bíóhúsin fljótlega.

Mynd dagsins er auglýsingamynd fyrir kvikmyndina "Stúlkan sem lék sér að eldinum" sem við Inga leigðum á DVD nú í kvöld.

Þorrablótið að bresta á!

Miðvikudagur 13. janúar 2010

Nú styttist í  hinn skemmtilega mánuð, Þorra. Það hefur alltaf þótt góður og þjóðlegur siður að blóta Þorra með því að koma saman, snæða kjarngóðan íslenskan mat og eiga góða stund. Síðustu ár höfum við Inga mætt strax á öðrum degi Þorra á Þorrablót Aftureldingar hér í Mosfellsbænum. Þetta er risa-þorrablót sem haldið er í íþróttamiðstöðinni hér í Mosfellsbænum. Um 500-700 manns mæta í matinn og boðið er upp á fyrsta flokks skemmtiatriði. Félagarnir Sveppi og Auddi verða kynnar þetta árið. Á eftir er svo alltaf stórdansleikur, að þessu sinni með Ingó og veðurguðunum og þá bætast nokkur hundruð manns við. Knattspyrnudeild og handknattleiksdeild Aftureldingar halda blótið saman og rennur allur ágóði til uppbyggingar barna- og unglingastarfs í íþróttafélaginu. Við Inga munum mæta til að eiga góða stund með sveitungum okkar og styrkja gott málefni í leiðini.

Mynd dagsins er tekin á bensínstöð N1 hér í Mosfellsbænum nú í kvöld. Þar hófst miðasala á risa-þorrablót Aftureldingar sem haldið verður á öðrum degi Þorra. Ég var mættur tímanlega til að krækja í gott borð fyrir minn hóp. Undirbúningsnefnd þorrablótsins var mætt á svæðið og bauð okkur miðakaupendum upp á nett staup af Brennivíni svona rétt til að kynda upp stemninguna! Á myndinni eru nokkrir af hinni samhentu og öflugu þorrablótsnefnd og í forgrunni er Hanna Sím að skenkja Rúnari forseta þorrablótsnefndarinnar af íslenskum öndvegisdrykk sem örugglega mun verða brúkaður frekar á þorrablótinu. Spennandi þorrablót framundan