Fundað um knattspyrnustefnu

Miðvikudagur 24. febrúar 2010

Í kvöld fór ég á skemmtilegan fund um stefnumótun Knattspyrnudeildar Aftureldingar í Mosfellsbæ. Þessi fundur er sá síðasti í þriggja funda röð um stefnu deildarinnar sem haldin hefur verið síðustu vikur. Eins og komið hefur fram áður í þónokkrum færslum, var ég um skeið í forystusveit knattspyrnudeildarinnar. Það hefur verið mjög gaman að taka þátt í þessum fundum enda nauðsynlegt að deildin fari í naflaskoðun á störfum sínum með reglubundnum hætti. Ekki er ástæða til að rekja frekar efni fundanna hér en starf knattspyrnudeildarinnar er merkt og mikilvægt fyrir bæjarfélagið. Gaman er að taka þátt í því og leggja sitt af mörkum.

Mynd dagsins er fengin af láni úr gamalli ársskýrslu Knattspyrnudeildar Aftureldingar en í kvöld var ég með góðu fólki á skemmtilegum fundi um stefnumótun í knattspyrnunni hér í Mosfellsbænum.