Jóhannes í fantaformi

Fimmtudagurinn 4. febrúar 2010

Nú í kvöld var ég staddur á Þorrablóti Hrafnistu í Hafnarfirði, eins af vinnustöðum mínum. Þar voru hátt í 200 manns samankomnir til að blóta saman Þorrann. Þar var glatt á hjalla og einn af mínum eftirlætisskemmtikröftum, Jóhannes Kristjánsson eftirherma, var mættur til að skemmta. Hann hefur glímt við heilsubrest í nokkurn tíma og um mitt síðasta ár lagðist hann undir hnífinn í hjartaskipti. Jóhannes er aðeins að laumast til að skemmta "af og til", eins og kappinn orðaði það sjálfur. Það var nú ekki að sjá á frammistöðu Jóhannesar að þar færi nýlega helsjúkur maður. Hann fór á kostum og snaraði fram nokkrum eftirhermum eins og hans er von og vísa, þar af nokkrum nýjum sem ég hef ekki séð áður. Gaman að sjá Jóhannes aftur kominn á kreik!

Mynd dagsins er af okkur Jóhannes Kristjánssyni á Þorrablótinu í kvöld þar sem Jóhannes fór á kostum!

Alveg ágætiseinkunn!

Miðvikudagur 3. febrúar 2010

Í dag voru foreldraviðtöl í Lágafellsskóla hér í Mosfellsbæ, þar sem synir okkar tveir stunda nám - Magnús Árni í 1. bekk og Ágúst Logi í 8. bekk. Við foreldranir mættum uppábúin að hitta kennarana þeirra. Fyrst Hildi Karen kennarann hans Ágústar og svo Hildi Halldóru sem kennir Magnúsi Árna. Það er mjög fínt fyrir gleymna foreldra á okkar aldri þegar kennararnir heita svona sama nafni. Við foreldranir vorum gríðarstolt eftir viðtölin. Báðir piltarnir eru að spjara sig með prýði í skólanum og standa sig bæði vel félagslega og í náminu. Bæði viðtölin voru frekar stutt þar sem kennararnir höfðu ekki mikið að segja nema bara að þeir vonuðu að piltarnir héldu áfram á sömu braut. Það er varla hægt að hugsa sér betri umsagnir um börnin sín en þetta svo við fórum með piltana og gáfum þeim góð verðlaun fyrir frammistöðuna

Mynd dagsins er að Lágafellsskóla hér í Mosfellsbænum þar sem við Inga vorum á mjög ánægjulegum foreldrafundum í dag! Myndin er fengin að láni af vef Mosfellsbæjar.

Tönn, tönn, tönn!

Þriðjudagur 2. febrúar 2010

Það var fjör þegar Eyþór vinur hans Magnúsar Árna var í heimsókn seinni partinn í dag . Þegar þeir voru búnir að leika sér í nokkurn tíma (og drasla vel til í herberginu) kom í ljós að ein framtönnin í Eyþóri var laf-laus. Tönnin datt svo úr stuttu síðar við mikinn fögnuð drengjanna. Það er alltaf gaman að missa tönn!

Mynd dagins sýnir Magnús Árna og Eyþór vin hans í fullu fjöri í að leika sér í dag. Eyþór "tannlausi" brosir sínu breiðasta og heldur á tönninni sem hann missti í dag!

Afmælisdagur mömmu!

Mánudagur 1. febrúar 2010

Mamma á afmæli í dag - eins og gefur að skilja er hún nokkru eldri en ég en annars var manni kennt það í æsku að ræða ekki aldur kvenna opinberlega  Seinni partinn skruppum við á Skagann í afmælisveislu. Inga var reyndar ekki með þar sem hún lagðist í rúmið í gærkvöldi með hálsbólgu og leiðindi. Held að það sé nú ekki sumarbústaðaferðin sem var svona erfið fyrir hana heldur eitthvað sem er búið að gerjast lengur. Á Skaganum var auðvitað vel tekið á móti okkur feðgum þar sem við áttum góða stund með mömmu og pabba í tilefni afmælisins.

Mynd dagins er tekin á Skaganum í kvöld í afmælisveislu mömmu. Þarna eru Magnús Árni og Ágúst Logi með mömmu og pabba!

Pottormar í pottinum!

Sunnudagur 31. janúar 2010

Við vöknuðum kát og hress í blíðskaparveðri í bústað Ástþórs og Sigrúnar í Skorradal. Eftir morgunverð skelltu flestir sér í morgunbað í pottinum. Svo snæddum við ljúffengan hádegisverð og gripum aðeins í spil áður en horft var á handbolta þar sem Ísland tryggði sér bronsverðlaun á Evrópumótinu í handbolta með því að leggja Pólverja að velli. Þetta var alveg frábær helgi í góðra vina hópi

Mynd dagsins er tekin í pottinum við sumarbústað Ástþórs og Sigrúnar í Skorradal. Þarna eru ansi margir pottormar komnir saman og varla hægt að koma fleirum í einu í pottinn!!

Sumarbústaðaferð í Skorradal

Laugardagur 30. janúar 2010

Í hádeginu í dag vorum við fjölskyldan komin upp í Skorradal. Þar á vinafólk okkar, Ástþór og Sigrún, glæsilegan sumarbústað. Þau skötuhjú, ásamt dótturinni Ástrósu, buðu okkur í heimsókn með strákana og auk þess voru með okkur vinafólk okkar Sævar og Hafdís ásamt börnum sínum þremur, þeim Arnari, Katrínu og Helenu. Við byrjuðum á því að horfa á handboltaleik milli Íslands og Frakklands, sem því miður fór ekki nógu vel. Eftir leikinn var skellt í vöfflur fyrir allan hópinn og svo fóru flestir í smá fjallgöngu enda veðrið hreint alveg guðdómlegt. Eftir góða fjallgöngu fóru svo flestir í heita pottinn og svo var töfruð fram þrírétta gómsæt máltíð með hjálp útigrillsins. Við fengum grillaðan humar í forrétt og fylltan lambahrygg í aðalrétt - alveg hreint frábærlega gott en þeir félagar Sævar og Ástþór áttu heiðurinn af máltíðinni. Við sátum svo við spilamennsku til að ganga fjögur um nóttina og var mikið hlegið enda við í frábærum félagsskap.

Mynd dagsins er tekin í fjallgöngu í Skorradal í dásamlegu veðri í dag. Vatnið er í baksýn og á þessari mynd eru: Efri röð frá vinstri: Sævar, Arnar Freyr, ég og Ágúst. Neðri röð: Sigrún, Ástrós, Katrín, Ástþór og Magnús Árni.

Inga skiptir um deild

Föstudagur 29. janúar 2010

Í kvöld vorum við Inga í skemmtilegu matarboði. Inga hefur starfað sem hjúkrunarfræðingur á Reykjalundi í nokkur ár. Nú um mánaðarmótin er hún að skipta um deild og frá og með fyrsta febrúar ætlar hún að starfa á nýrri deild á Reykjalundi sem verið er að stofna. Deildin er legudeild og kallast Miðgarður. Hjúkrunarfræðingarnir á gömlu deildinni ákváðu að halda matarboð í kveðjuskyni fyrir Ingu og var það haldið heima hjá Rögnu, deildarstjóranum. Við áttum mjög skemmtilegt kvöld. Boðið var upp á þrírétta máltíð og svo spiluðum skemmtilegt spurningaspil saman og fórum í fleiri leiki. Við áttum mjög góða stund fram á nótt.

Mynd dagsins er úr matarboði kvöldsins sem hjúkrúnarfræðingarnir úr samstarfshóp Ingu á Reykjalundi, héldu henni í kveðjuskyni þar sem hún færir sig yfir á nýja deild nú á mánudaginn. Aldeilis frábært kvöld! Á myndinni eru frá vinstri: Kristján, Nína, Einar, Jóhanna, Ragna, Albert, Gústi, Hafdís og Inga.

Tannlæknirinn tekur tvær tennur!

Fimmtudagur 28. janúar 2010

Í dag fylgdi ég Ágústi Loga syni mínum til tannlæknis. Hann hefur verið hjá sama tannlækni síðan hann var pínulítill en það er hinn mjög svo ágæti Magnús Kristinsson. Í dag var stórt verkefni á dagskrá - fjarlægja þurfti tvær barnatennur. Ástæða þessa inngrips tannlæknisins er víst sú að þessar tvær barnatennur eru ekkert á því að fara að yfirgefa munn piltsins. Það þýðir að fullorðinstennurnar sem eiga vaxa þar í staðinn komast ekki að og eru að byrja vaxa til hliðar - sem er auðvitað ekki gott. Það er ekkert smá flott að fara til tannlæknis í dag. Ágúst valdi sér Simpsons-þátt til að horfa á í sjónvarpsgleraugunum sem hann fær hjá tannlækninum og eru sett á höfuðið meðan á dvölinni stendur. Svo var kappinn deyfður og tennurnar teknar úr fljótt og örugglega. Við Magnús spjölluðum svo mikið á meðan að ég hafði mestar áhyggjur af því að hann myndi gleyma einhverju. Það voru nú óþarfa áhyggjur og Ágúst Logi er tveimur barnatönnum fátækari.

 

Mynd dagins er tekin í tannlæknastólnum í dag. Þarna er Ágúst Logi í tannlæknastólnum og Magnús tannlæknir og aðstoðarkona hann eru að undirbúa verkefni dagsins - að taka tvær barnatennur sem tókst bara vel!

 

Varðskipið Óðinn í hálfa öld

Miðvikudagurinn 27. janúar 2010

Í dag var mér boðið á Sjóminjasafnið Víkina hér í Reykjavík. Þetta er glæsilegt safn úti á Grandagarði og ekki mjög mörg ár síðan það opnaði. Tilefnið var að verið var að halda upp á 50 ára afmæli varðskipsins Óðins sem þjónaði Landhelgisgæslunni á árum áður. Fyrir tveimur árum var skipið fært á safnið og þar stendur það nú við bryggju sem hluti af safninu. Eftir ræður heldra fólks og tilheyrandi góðgæti, gátu gestir skoðað safnið og auðvitað skipið. Ég man ekki eftir að hafa komið í íslenskt varðskip áður og beið því ekki boðanna að skoða skipið þegar tækifæri gafst. Það var mjög gaman og fróðlegt og ekki spillti fyrir að ég naut góðrar leiðsagnar nokkra fyrrverandi skipverja sem sýndu skipið hátt og lágt og sögðu skemmtilegar sögur af lífinu um borð. Mynd dagsins er tekin í varðskiptinu Óðni nú í kvöld. Þarna er ég inn í skýli á dekki skipsins þar sem ein byssan er geymd (veit nú ekki hvort þetta kallast fallbyssa). Mjög gaman að skoða þetta merka skip!

Hamstur kominn á heimilið!

Þriðjudagur 26. janúar 2010

Það er kominn nýr fjölskyldumeðlimur á heimilið - hamsturinn Skúri. Skúri kom til okkar í gær í afmælisveislu Magnúsar Árna. Magnús hafði frétt af því að í gamla daga hefði ég kunnað að sýna töfrabrögð og því til stuðnings var hann búinn að finna forláta galdratösku mína upp á háalofti. Ég lofaði að reyna að gera eitthvað. Eftir að hafa sýnt piltunum nokkur töfrabrögð voru þeir nú samt á því að það væri ekki hægt að galdra í alvörunni. Eftir nokkrar rökræður við drengina varð úr að ég þyrfti að galdra dýr til að geta sagst vera alvöru galdramaður. Ákveðið var að ég skildi galdra fram annað hvort hamstur eða ljón. Mönnum þótti nú öruggara að það væri hamstur þar sem ég sagðist ekki vera viss um að geta galdrað fram dýr og ég gæti þá örugglega ekki galdrað það til baka aftur. Ekki vildu þeir að við sætum uppi með ljón svo hamstur varð fyrir valinu. Það varð heldur en ekki betur undrun í hópnum þegar ég galdraði fram hamstur. Að sjálfsögðu tókst mér samt ekki að galdra hamsturinn til baka þannig að honum var komið fyrir í fötu og ég sendur út í búð að kaupa mat o.fl. Magnús Árni vildi endilega fá að eiga hamsturinn og eftir að hafa auglýst eftir búri á facebook máttum við nálgast eitt slíkt hjá nágrönnum okkar. Magnús skýrði hamsturinn Skúra og við erum nú búin að fá leiðbeiningar í dýrabúð hvernig á að hugsa um hann því við höfum aldrei átt hamstur áður.

Mynd dagsins er af nýjasta fjölskyldumeðliminum, hamstrinum Skúra. Hér er hann í ægilega fínu búri sem við fengum hjá nágrönnum okkar og verður framtíðarheimili Skúra!